უკრაინამ უმსხვილესი მარკეტპლეისის, Wildberries-ის ათი უდიდესი ლოგისტიკური ცენტრიდან შვიდი მწყობრიდან გამოიყვანა, – ინფორმაციას უკრაინული მედია ქვეყნის თავდაცვის სამინისტროზე დაყრდნობით ავრცელებს.
უწყების ცნობით, მოსკოვის ოლქში დრონებით თავდასხმის შემდეგ, ინდუსტრიულ პარკ „კოლედინოში“ მდებარე Wildberries-ის ლოგისტიკურმა ცენტრმა ფუნქციონირება შეწყვიტა.
უკრაინის თავდაცვის სამინისტროში აცხადებენ, რომ ეს იყო კომპანიის ყველაზე დიდი საწყობი ფართობის მიხედვით – დაახლოებით 250 000 კვადრატული მეტრი.
ღამის თავდასხმის შემდეგ ფუნქციონირება შეწყვიტა დომოდედოვოს საწყობმაც.
შეგახსენებთ, მანამდე ცნობილი გახდა, რომ რუსეთის მოსკოვის ოლქის ქალაქ პოდოლსკში დრონით თავდასხმის შედეგად Wildberries-ის უდიდეს საწყობში მასშტაბური ხანძარი გაჩნდა.
