ხაშურის სასპორტო სკოლის ძალოსნობის ჯგუფის სპორტსმენებმა გიორგი ასანიძის სახელობის ტურნირზე რამდენიმე საპრიზო ადგილი დაიკავეს.
შეჯიბრება 31 აგვისტოსა და 1-2 სექტემბერს ქალაქ საჩხერეში გაიმართა. ტურნირი 23 წლამდე ასაკის ძალოსნებს შორის ჩატარდა და მას ტრადიციული ხასიათი აქვს. შეჯიბრება ყოველწლიურად იმართება.
ტურნირის მიზანი ახალგაზრდა სპორტსმენებში ძალოსნობის პოპულარიზაცია და სპორტის ამ სახეობის განვითარების ხელშეწყობაა. საპრიზო ადგილზე გასულ სპორტსმენებს მედლები, სიგელები და ფულადი ჯილდოები გადაეცათ.
ხაშურის სასპორტო სკოლის წარმომადგენელთა შორის საუკეთესო შედეგი გიგა ოდიკაძემ აჩვენა. მან პირველი ადგილი დაიკავა როგორც ატაცში, ისე აკვრასა და ორჭიდში.
ავთო ჩანდიშვილმა ატაცში მესამე ადგილი, ხოლო აკვრასა და ორჭიდში მეორე ადგილი მოიპოვა.
ხაშურის სასპორტო სკოლის ძალოსნობის ჯგუფის სპორტსმენებს წარმატებულ ასპარეზობას ვულოცავთ და მომავალ შეჯიბრებებზე წარმატებებს ვუსურვებთ.
