გორის მუნიციპალიტეტის საოკუპაციო ხაზთან მდებარე სოფელ ბერშუეთის საჯარო სკოლაში ახალი სასწავლო წლის დაწყებასთან დაკავშირებით საზეიმო ღონისძიება გაიმართა.
სკოლის მოსწავლეებსა და პედაგოგებს ახალი სასწავლო წლის დაწყება შიდა ქართლის სახელმწიფო რწმუნებულმა სიმონ გულედანმა, გორის მუნიციპალიტეტის მერის მოადგილემ თორნიკე ფხაკაძემ და გორის საგანმანათლებლო რესურსცენტრის ხელმძღვანელმა გიორგი ბერძენიშვილმა მიულოცეს.
ბერშუეთის საჯარო სკოლაში ამჟამად 162 მოსწავლე სწავლობს. გასულ წელს სკოლაში მასშტაბური სარეაბილიტაციო სამუშაოები დასრულდა და განახლებულ შენობაში თანამედროვე სასწავლო გარემო მოეწყო.
სკოლაში ფუნქციონირებს საბუნებისმეტყველო და კომპიუტერული ლაბორატორიები, ბიბლიოთეკა და სააქტო დარბაზი. ასევე განახლდა სპორტული ინფრასტრუქტურა, მოეწყო ექიმის კაბინეტი და რესურსოთახი.
ახალი სასწავლო წლის დაწყებასთან დაკავშირებით სიმონ გულედანმა მოსწავლეებსა და პედაგოგებს წარმატებული და ნაყოფიერი სასწავლო წელი უსურვა.
„ახალი სასწავლო წლის დაწყებას ვულოცავ თითოეულ მოსწავლესა და პედაგოგს. გისურვებთ წარმატებულ, საინტერესო და ნაყოფიერ სასწავლო წელს. ჩვენთვის უმნიშვნელოვანესია, რომ რეგიონის თითოეულ მოსწავლეს ჰქონდეს თანაბარი შესაძლებლობა, მიიღოს თანამედროვე განათლება და სამომავლოდ წარმატებით გამოიყენოს მიღებული ცოდნა. ამ მიმართულებით აქტიურ მუშაობას მომავალშიც გავაგრძელებთ“, – განაცხადა სიმონ გულედანმა.
