გორის საფეხბურთო სკოლის გუნდებმა ფოთსა და ქობულეთში გამართულ საზაფხულო ტურნირებზე წარმატებით იასპარეზეს და ორი ასაკობრივი კატეგორიის შეჯიბრებაში პირველი ადგილი დაიკავეს.
განსაკუთრებით წარმატებული აღმოჩნდა გორის U11 გუნდი, რომელმაც ქობულეთში რევაზ ჩელებაძის სახელობის ტურნირი მოიგო. შეჯიბრებაში 26 გუნდი მონაწილეობდა.
გორელებმა ფინალურ შეხვედრაში თბილისის „ვიკინგს“ 1:0 მოუგეს და ტურნირის გამარჯვებულები გახდნენ.
ტურნირის საუკეთესო ფეხბურთელის პრიზი გორის გუნდის წევრ მათე კარელიძეს გადაეცა, საუკეთესო მეკარედ კი ლუკა ბაკურაძე დასახელდა.
გორის U11 გუნდის მწვრთნელები არჩილ ოლგესაშვილი და ბაჩო ცხადაძე არიან.
პირველ ადგილზე დაასრულა ასპარეზობა გორის U15 გუნდმაც, რომელმაც ფოთში გამართულ ტურნირში გაიმარჯვა.
შეჯიბრების ორგანიზატორებმა ტურნირის საუკეთესო მოთამაშედ გორელი ფეხბურთელი ნიკოლოზ ჩუხრუკიძე დაასახელეს, საუკეთესო მეკარის პრიზი კი მათე კოკოზაშვილმა მიიღო.
გორის U15 გუნდის მწვრთნელები ვაჟა ხაჩირაშვილი, დავით ხოხობაშვილი და მამუკა ვარდოსანიძე არიან.
გორის საფეხბურთო სკოლის გუნდებისთვის საზაფხულო ტურნირები მნიშვნელოვანი გამოცდილება აღმოჩნდა, სადაც ახალგაზრდა ფეხბურთელებმა საკუთარი შესაძლებლობები გამოავლინეს და მაღალი შედეგები აჩვენეს.
