გორში, სოფელ კარალეთში, ფრინველთა ორი სასაკლაოს შემოწმების შედეგად სურსათის უვნებლობის კრიტიკული შეუსაბამობები გამოვლინდა.
სურსათის ეროვნული სააგენტოს შიდა ქართლის დეპარტამენტის ინსპექტორებმა სახელმწიფო კონტროლის ფარგლებში, არაგეგმური შემოწმება ჩაატარეს ფიზიკური პირის, გ. ს.-ისა და ინდივიდუალური მეწარმე ვ. ხ.-ის კუთვნილ ობიექტებზე.
ინსპექტირებისას დადგინდა, რომ ორივე ბიზნესოპერატორი ფრინველს სავალდებულო აღიარებისა და ეკონომიკურ საქმიანობათა რეესტრში რეგისტრაციის გარეშე კლავდა.
სააგენტოს ინფორმაციით, გამოვლენილი დარღვევების გამო ბიზნესოპერატორები დაჯარიმდნენ, საწარმოო პროცესი კი შეუჩერდათ.
სურსათის ეროვნული სააგენტო არალეგალური საწარმოების გამოვლენას ქვეყნის მასშტაბით აგრძელებს და ბიზნესოპერატორებს სურსათის უვნებლობის კანონმდებლობით გათვალისწინებული მოთხოვნების დაცვისკენ მოუწოდებს.
