ქარელის მუნიციპალიტეტში გამწვანების აქცია „ჩემი პირველი ნერგი“ გაიმართა. ინიციატივის ფარგლებში საჯარო სკოლების პირველკლასელებმა მწვანე ნარგავები სკოლების, საბავშვო ბაღებისა და სკვერების ტერიტორიებზე დარგეს.
აქციაში მოსწავლეებთან ერთად მონაწილეობდნენ ქარელის მუნიციპალიტეტის მერი ზაზა გულიაშვილი და მერის პირველი მოადგილე ვლადიმერ სულაქველიძე.
მუნიციპალიტეტის მასშტაბით გამწვანების პროცესში 374 ბავშვი ჩაერთო. დაირგო ცხრა სახეობის ნერგი, რომლებიც რეგიონის ბუნებრივი და კლიმატური პირობების გათვალისწინებით შეირჩა.
„ჩემი პირველი ნერგი“ საქართველოს მთავრობის ინიციატივაა და მისი მიზანი ბავშვებში ადრეული ასაკიდან გარემოსდაცვითი ცნობიერების ამაღლება და ბუნებაზე ზრუნვის პასუხისმგებლობის ჩამოყალიბებაა.
პროგრამა საქართველოს პრემიერ-მინისტრის, ირაკლი კობახიძის მიერ ხელმოწერილი განკარგულების საფუძველზე ხორციელდება. მის განხორციელებაში ჩართულნი არიან გარემოს დაცვისა და სოფლის მეურნეობის სამინისტრო, განათლების, მეცნიერებისა და ახალგაზრდობის სამინისტრო, თბილისის მერია, სახელმწიფო რწმუნებულების ადმინისტრაციები და მუნიციპალიტეტები.
პროგრამის ფარგლებში ნერგების დარგვა 22 ოქტომბერს დაიწყო და 9 ნოემბრის ჩათვლით გაგრძელდება. ინიციატივისთვის სპეციალური ვებპლატფორმაც შეიქმნა, სადაც განთავსებულია ინფორმაცია ნერგების სახეობებისა და მათი მოვლის წესების შესახებ: https://cheminergi.eiec.gov.ge/ka
