ქარელის ცენტრალურ საფეხბურთო სტადიონზე სარეაბილიტაციო სამუშაოები აქტიურად მიმდინარეობს. მიმდინარე სამუშაოები შიდა ქართლის სახელმწიფო რწმუნებულმა სიმონ გულედანმა, ქარელის მუნიციპალიტეტის მერთან ზაზა გულიაშვილთან და ადგილობრივი თვითმმართველობის წარმომადგენლებთან ერთად დაათვალიერა.
რეგიონის რწმუნებულის განცხადებით, სტადიონის რეაბილიტაცია 2027 წელს დასრულდება და ქარელს სრულად განახლებული სპორტული ინფრასტრუქტურა ექნება.
პროექტის ფარგლებში მოეწყობა საფეხბურთო მოედანი, ტრიბუნები და გასახდელები, დაიგება თანამედროვე ხელოვნური საფარი, დამონტაჟდება განათების სისტემა და ღობე, ასევე მოეწყობა მსაჯთა ოთახი.
განახლებული სტადიონი 800 მაყურებელზე იქნება გათვლილი.
ქარელის მერის, ზაზა გულიაშვილის განცხადებით, არსებული სტადიონი წლების განმავლობაში ამორტიზებული იყო და ადგილობრივ გუნდს სავარჯიშოდ აგარის სტადიონით სარგებლობა უწევდა. რეაბილიტაციის დასრულების შემდეგ კი სპორტსმენებსა და გულშემატკივრებს თანამედროვე და უსაფრთხო ინფრასტრუქტურა ექნებათ.
პროექტის ჯამური ღირებულება 4 მილიონ ლარს შეადგენს. სამუშაოები რეგიონებში განსახორციელებელი პროექტების ფონდისა და ქარელის მუნიციპალიტეტის ადგილობრივი ბიუჯეტის თანადაფინანსებით ხორციელდება.
