ქარელის მუნიციპალიტეტის სოფელ დირბში შიდა საუბნო გზების რეაბილიტაცია აქტიურად მიმდინარეობს. სამუშაოები საქართველოს მთავრობის 2026 წლის 10 მარტის №509 განკარგულებისა და ქარელის მუნიციპალიტეტის ადგილობრივი ბიუჯეტის თანადაფინანსებით ხორციელდება.
პროექტის ფარგლებში სოფელ დირბში სამი მონაკვეთის კეთილმოწყობაა დაგეგმილი. ჯამში მოეწყობა დაახლოებით 1.3 კილომეტრი ასფალტობეტონის საფარი, გზებთან მიერთებები, ეზოებში შესასვლელები და სანიაღვრე არხი.
პროექტის განხორციელება მნიშვნელოვნად გააუმჯობესებს სოფლის საგზაო ინფრასტრუქტურას და ადგილობრივი მოსახლეობისთვის გადაადგილებას უფრო კომფორტულსა და უსაფრთხოს გახდის.
სამუშაოების მიმდინარეობას ქარელის მუნიციპალიტეტის მერი ზაზა გულიაშვილი და ადგილობრივი ხელისუფლების წარმომადგენლები გაეცნენ.
პროექტს შპს „გზების და მშენებლობის ჯგუფი“ ახორციელებს.
