ხაშურის მუნიციპალიტეტის საბიბლიოთეკო გაერთიანება მოქალაქეებს მოუწოდებს, ცენტრალური ბიბლიოთეკის მიმდებარე სკვერში განთავსებული „წიგნის ბუდით“ სარგებლობისას დაწესებული პრინციპი დაიცვან.
„წიგნის ბუდე“ მოქალაქეებისთვის წიგნების თავისუფალი გაცვლის სივრცეა, სადაც შესაძლებელია წიგნის წაღება, წაკითხვა და შემდეგ მისი უკან დაბრუნება ან სხვა წიგნით ჩანაცვლება.
ბიბლიოთეკის ინფორმაციით, არაერთი მცდელობის მიუხედავად, „წიგნის ბუდეში“ განთავსებული წიგნები ხშირად აღარ ბრუნდება.
საბიბლიოთეკო გაერთიანება ხაშურელებს მოუწოდებს, გამოიჩინონ მოქალაქეობრივი პასუხისმგებლობა და წაკითხული წიგნები კვლავ „წიგნის ბუდეში“ დააბრუნონ ან ახალი წიგნით ჩაანაცვლონ.
„წიგნის ბუდე“ სწორედ იმისთვის შეიქმნა, რომ წიგნი ერთმა ადამიანმა წაიკითხოს, შემდეგ კი მისი გაზიარებით სხვასაც მიეცეს კითხვის შესაძლებლობა.
