გორში ჩატარებულ საერთაშორისო ტურნირს „Open Gori“ 2027 წლიდან ძმები გიორგი და გელა რომელაშვილების სახელობის მემორიალური ტურნირის სტატუსი ექნება.
გადაწყვეტილების შესახებ საქართველოს სპორტული კარატის ეროვნული ფედერაციის პრეზიდენტთან, თემურ გიგნაძესთან, გამართულ შეხვედრაზე შეთანხმდნენ. შეხვედრაში მონაწილეობდნენ გორის მუნიციპალიტეტის მერი კონსტანტინე ბუზალაძე და მერის მოადგილე თორნიკე ფხაკაძე.
მემორიალური ტურნირის კარატეს მსოფლიო ფედერაციის კალენდარში შეტანაც იგეგმება. შეჯიბრების ორგანიზატორები გორის მუნიციპალიტეტის მერია და საქართველოს სპორტული კარატის ეროვნული ფედერაცია იქნებიან.
პირველი მემორიალური ტურნირი 2027 წელს გაიმართება.
შეხვედრაზე ასევე განიხილეს გორში კარატეს განვითარების საკითხები და სპორტის ამ სახეობის პოპულარიზაციის შესაძლებლობები.
გიორგი და გელა რომელაშვილები 2008 წლის აგვისტოს ომში დაიღუპნენ. ძმები წლების განმავლობაში გორში კარატეს სექციაში ვარჯიშობდნენ.
მათი სახელობის საერთაშორისო მემორიალური ტურნირის დაფუძნება გმირი ძმების ხსოვნის უკვდავსაყოფად და სპორტის საშუალებით მათი სახელების მომავალი თაობებისთვის გადასაცემად გადადგმული კიდევ ერთი მნიშვნელოვანი ნაბიჯი იქნება.
