ქარელის მუნიციპალიტეტის სოფელ ბერძენაულში შიდა საუბნო გზების რეაბილიტაცია მიმდინარეობს. პროექტის ფარგლებში სოფლის გზების მდგომარეობა გაუმჯობესდება და ადგილობრივი მოსახლეობისთვის გადაადგილება უფრო კომფორტული გახდება.
სარეაბილიტაციო სამუშაოები გზა №2-სა და №4-ზე ხორციელდება. პროექტი ითვალისწინებს ორფენიანი ასფალტობეტონის საფარის, ხელოვნური ნაგებობების, გზებთან მიერთებებისა და ეზოებში შესასვლელების მოწყობას.
ამ ეტაპზე გზა №4-ზე 347 მეტრი სიგრძის მონაკვეთზე მსხვილმარცვლოვანი ასფალტობეტონით გზის საფარის ქვედა ფენის მოწყობა მიმდინარეობს.
სამუშაოების მიმდინარეობას ქარელის მუნიციპალიტეტის მერი ზაზა გულიაშვილი და ადგილობრივი ხელისუფლების წარმომადგენლები გაეცნენ.
პროექტი ქარელის მუნიციპალიტეტის ადგილობრივი ბიუჯეტიდან ფინანსდება.
სამუშაოებს შპს „გ.კ“ ასრულებს.
