გორელი ახალგაზრდებისთვის სტეფანწმინდაში ხუთდღიანი მოლაშქრეთა ბანაკი მოეწყობა, რომლის ფარგლებშიც მონაწილეები მთიან რეგიონს, ადგილობრივ კულტურასა და ტრადიციებს გაეცნობიან.
პროექტის ფარგლებში ახალგაზრდები სტეფანწმინდასა და მის მიმდებარე ტერიტორიებს მოინახულებენ და მონაწილეობას მიიღებენ ადგილობრივ ფოლკლორულ ფესტივალში, სადაც საკუთარ შემოქმედებით შესაძლებლობებს წარმოადგენენ.
პროექტში მონაწილეობის მიღება შეუძლიათ 14-დან 19 წლამდე ახალგაზრდებს, რომლებიც გამოირჩევიან შემოქმედებითი უნარებით და განსაკუთრებით ინტერესდებიან მოგზაურობით, მთითა და ახალი გამოცდილებების მიღებით.
მონაწილეთა შერჩევა გასაუბრების საფუძველზე მოხდება. ახალგაზრდები სტეფანწმინდაში 7 სექტემბერს გაემგზავრებიან და იქ ხუთ დღეს გაატარებენ.
პროექტში მონაწილეობის მსურველებმა განაცხადი 5 სექტემბრის ჩათვლით, მშობელთან ერთად, ასოციაცია „ტონთიოს“ ადმინისტრაციულ შენობაში უნდა წარადგინონ.
მისამართი: გორი, გორჯვრის ქ. №26.
საჭიროა შემდეგი დოკუმენტების წარდგენა:
- პირადობის მოწმობა ან დაბადების მოწმობა;
- ჯანმრთელობის ცნობა — ფორმა №100;
- მშობლის თანხმობა, რომელსაც მშობელი ადგილზე, სპეციალურ ფორმაზე შეავსებს.
პროექტი ასოციაცია „ტონთიოსთან“ თანამშრომლობით, გორის მუნიციპალიტეტის მერიის „კულტურული ღონისძიებების ხელშეწყობისა და თანადაფინანსების პროგრამის“ ფარგლებში განხორციელდება.
დამატებითი ინფორმაციისთვის შესაძლებელია დაკავშირება ნომერზე: 599 22 16 44.
