გორის მუნიციპალიტეტში ჯანდაცვისა და სოციალური პროგრამების ფარგლებში, 2026 წლის აგვისტოს ჩათვლით, 6 523 მოქალაქის 8 051 განცხადება დაკმაყოფილდა.
მუნიციპალიტეტის ინფორმაციით, მოქალაქეებმა სხვადასხვა სახის დახმარების სახით 3,5 მილიონ ლარზე მეტი მიიღეს.
ჯანდაცვის პროგრამები ითვალისწინებს ონკოლოგიური პაციენტების, სოციალურად დაუცველი მოქალაქეების, ქრონიკული და იშვიათი დაავადებების მქონე პირების, ასევე აუტიზმისა და სქოლიოზის მქონე ბავშვების სამედიცინო დახმარებას, მედიკამენტებით უზრუნველყოფასა და რეაბილიტაციას.
სოციალური პროგრამების ფარგლებში ფინანსური მხარდაჭერა ეძლევათ მრავალშვილიან ოჯახებს, სოციალურად დაუცველ სტუდენტებსა და სპორტსმენებს, შშმ პირებს, ვეტერანებს, ობოლ ბავშვებს, მარტოხელა მშობლებს, ძალადობის მსხვერპლებს, ხანდაზმულებსა და სხვა მოწყვლად ჯგუფებს.
პროგრამები ასევე ითვალისწინებს მოქალაქეების საცხოვრებლითა და სარიტუალო მომსახურებით უზრუნველყოფას.
გორის მუნიციპალიტეტის ინფორმაციით, 2026 წელს ჯანდაცვისა და სოციალური პროგრამების ბიუჯეტი 4,5 მილიონი ლარითაა განსაზღვრული.
