გორში პედაგოგიურ მეცნიერებათა დოქტორის, განათლების მეცნიერებათა აკადემიის აკადემიკოსისა და პროფესორ შოთა ქურდაძის სახელობის მემორიალური დაფა გაიხსნა.
მემორიალური დაფა იმ სახლის ფასადზე განთავსდა, სადაც შოთა ქურდაძე 1964 წლიდან 2017 წლამდე ცხოვრობდა.
ღონისძიებას გორის მუნიციპალიტეტის მერი კონსტანტინე ბუზალაძე, ადგილობრივი ხელისუფლების წარმომადგენლები, შოთა ქურდაძის ოჯახის წევრები და მეგობრები ესწრებოდნენ. შეკრებილებმა გაიხსენეს მეცნიერის ცხოვრება და მოღვაწეობა და ის მნიშვნელოვანი წვლილი, რომელიც მან განათლებისა და პედაგოგიური მეცნიერების განვითარებაში შეიტანა.
შოთა ქურდაძე გამორჩეული პედაგოგი და მეცნიერი იყო. მისი მრავალწლიანი სამეცნიერო და პედაგოგიური საქმიანობა მნიშვნელოვანი მემკვიდრეობაა და არაერთი თაობისთვის პროფესიონალიზმისა და განათლების სფეროსადმი ერთგულების მაგალითს წარმოადგენს.
