ფესტივალის მთავარი მიზანი ხელოვნებისა და კულტურის საშუალებით მშვიდობის იდეის გაძლიერება, საზოგადოების გაერთიანება და საოკუპაციო ხაზთან მცხოვრები მოსახლეობის მხარდაჭერაა.
ღონისძიება 12:00 საათზე, არბოს ტაძარში, აგვისტოს ომში დაღუპულთა სულის მოსახსენიებელი პანაშვიდით გაიხსნება. ამის შემდეგ სტუმრებს ანტონ ფურცელაძის ისტორიული სასახლის ეზოში მრავალფეროვანი კულტურული პროგრამა ელოდებათ.
15:00 საათზე გაიმართება კინოჩვენება და დისკუსია. მაყურებელი მერაბ ჩხაიძის ფილმს „აგვისტოს ომზე“ და გიორგი ჭუმბურიძის ფილმს „შავი შაშვი ჩიო-ოო-და“ იხილავს, რომელიც ანზორ ერქომაიშვილის ხსოვნას ეძღვნება.
17:00 საათზე პოეზიის საათი დაიწყება. საკუთარი შემოქმედებით აუდიტორიის წინაშე გიორგი სოსიაშვილი და ქეთი ჯოლბორდი წარდგებიან.
ფესტივალის პროგრამა 19:00 საათზე საზეიმო დახურვით დასრულდება, რომელსაც ანსამბლ „მართვეს“ კონცერტი დაასრულებს.
„მადლობა ღმერთს, ჩვენ ხალხს არც გონება და არც ხალისი არ აკლია, მხოლოდ უნდათ მაგალითის დანახვება…“ — წერდა ანტონ ფურცელაძე. სწორედ ამ სულისკვეთებით შექმნილი ფესტივალი საზოგადოებას ხელოვნების, კულტურისა და მშვიდობის იდეის გარშემო აერთიანებს.
ფესტივალზე დასწრება თავისუფალია და ღონისძიებაზე დასწრება ყველა მსურველს შეუძლია.
პროექტი საქართველოს კულტურის სამინისტროს, სსიპ „შემოქმედებითი საქართველოსა“ და გორის მუნიციპალიტეტის მხარდაჭერით ხორციელდება. ფესტივალის კოლაბორატორი და თანაორგანიზატორია „ARTVISION“.
