ხაშურის მუნიციპალიტეტის საკრებულომ 6 აგვისტოს გამართულ სხდომაზე მნიშვნელოვანი გადაწყვეტილება მიიღო. ოქტომბრის ქუჩასა და მის მიმდებარე ჩიხებს საქართველოს დამსახურებული მწერლისა და საზოგადო მოღვაწის, ნოდარ დუმბაძის სახელი მიენიჭება.
გადაწყვეტილება საკრებულოს სხდომაზე ერთხმად იქნა მიღებული და მიზნად ისახავს ქართველი კლასიკოსი მწერლის ხსოვნის პატივისცემასა და მისი სახელის უკვდავყოფას.
ნოდარ დუმბაძე XX საუკუნის ქართული ლიტერატურის ერთ-ერთი ყველაზე გამორჩეული წარმომადგენელია. მისი რომანები და მოთხრობები ქართული ლიტერატურის კლასიკად არის აღიარებული და არაერთ ენაზეა თარგმნილი. მისმა შემოქმედებამ არაერთი თაობის სიყვარული და აღიარება დაიმსახურა. მწერლის ნაწარმოებები დღესაც განსაკუთრებული პოპულარობით სარგებლობს როგორც საქართველოში, ისე მის ფარგლებს გარეთ.
