ბიბლიოთეკაში პიანისტისა და მწერლის, ნონა გულიაშვილის, შემოქმედებითი საღამო გაიმართა, რომელიც მუსიკისა და ლიტერატურის ჰარმონიული შერწყმით წარიმართა.
ღონისძიების ფარგლებში სტუმრებს შესაძლებლობა ჰქონდათ, გაცნობოდნენ ნონა გულიაშვილის მრავალფეროვან შემოქმედებასა და ცხოვრებისეულ გზას. საღამოს ერთ-ერთი მთავარი ნაწილი ავტორის წიგნის — „მელნისფერი სიჩუმე“ -წარდგენა იყო.
წიგნში ავტორი საკუთარ განცდებსა და შინაგან სამყაროს მკითხველს განსაკუთრებული ემოციით უზიარებს. ნონა გულიაშვილის შემოქმედებაში მნიშვნელოვანი ადგილი უკავია ემიგრაციის თემასა და მასთან დაკავშირებულ განცდებს.
მწერლის ბიოგრაფია და შემოქმედება დამსწრე საზოგადოებას ბიბლიოთეკასთან არსებული კითხვის წრის წევრმა, ხაშურის მე-5 საჯარო სკოლის მოსწავლემ ანი ქურდაძემ გააცნო. მან ასევე ისაუბრა ავტორის შემოქმედებაში ასახულ ემიგრაციის ტკივილსა და გამოცდილებაზე.
ხაშურის მე-2 საჯარო სკოლის მოსწავლემ ანა იკაევმა კი ნონა გულიაშვილის შემოქმედებიდან ერთ-ერთი მონაკვეთი მხატვრულად წარმოადგინა.
საღამოს მუსიკალური ნაწილი ხათუნა ღვალაძემ და გიორგი ბაქრაძემ გააფორმეს, მათმა შესრულებამ ღონისძიებას განსაკუთრებული სითბო და ემოციური განწყობა შესძინა.
ღონისძიებას ადგილობრივი და მოწვეული სტუმრები ესწრებოდნენ. შეხვედრა თბილ და საინტერესო გარემოში გაიმართა.
შემოქმედებითმა საღამომ კიდევ ერთხელ წარმოაჩინა ბიბლიოთეკის, როგორც წიგნის, მუსიკის, ხელოვნებისა და ადამიანების შეხვედრის სივრცის მნიშვნელობა და საზოგადოებას შესაძლებლობა მისცა, ერთ გარემოში გაეზიარებინა ლიტერატურისა და მუსიკის ემოციები.
