,, მე მინდა მადლობა გადავუხადო იმ მედიასაშუალებებს, რომლებიც აქტიურად აშუქებდნენ ჩვენს ჟურნალისტზე და ოპერატორზე მომხდარ თავდასხმის ფაქტს“ -  ამის შესახებ ,,ტვ მონიტორინგის„ დამფუძნებელმა, მაია ტატულაშვილმა განცხადება გადაცემა ,,კვირის მთავარ მონიტორინგში“ სტუმრობისას გააკეთა. ტატულაშვილი თვლის, რომ ასეთ სიტუაციებში ერთმანეთის მხარდაჭერა განსაკუთრებით მნიშვნელოვანია.

,,როდესაც ყოფილა მედიის წარმომადგენლებზე ძალადობის შემთხვევები ჩვენ ყოველთვის მათ გვერდით ვიყავით და ვართ. ჩვენ არ გვაინტერესებს, ვინ რას აშუქებს და რა ინტერესები აქვთ. ჩვენ ყოველთვის ვგმობთ ჟურნალისტებზე ძალადობას და მათ მხარდასაჭერად ყველაფერს ვაკეთებთ“ - განაცხადა მაია ტატულაშვილმა.

ტვ მონიტორინგის დამფუძნებელი თვლის, რომ მსგავსი შემთხვევების დროს მედიია უნდა იყოს ერთიანი.

შეგახსენებთ, ძალადობრივი და პრორუსული "ალტ-ინფოს" პარტიის მთვრალი წევრები და მხარდამჭერები "ტვ მონიტორინგის" გადამღებ ჯგუფს ქარელში თავს 5 ივლისს დაესხნენ.

მომხდარზე გამოძიება ჟურნალისტურ საქმიანობაში უკანონოდ ხელის შეშლის ფაქტზე, საქართველოს სსკ-ის 154-ე მუხლის პირველი ნაწილით  დაიწყო.

ტვ მონიტორინგის ჟურნალისტი, შოთიკო სადაღაშვილი და ოპერატორი თორნიკე გელიტაშვილი საგამოძიებო უწყებაში უკვე გამოკითხეს. საქმეზე გრძელდება გამოძიება.