ბადრი ბასიშვილმა „ნაციონალური მოძრაობის“ პოლიტსაბჭო დატოვა
„ნაციონალური მოძრაობის“ ერთ-ერთი წევრი ბადრი ბასიშვილი აცხადებს, რომ პარტიის პოლიტსაბჭოს ტოვებს. ამის შესახებ ის სოციალურ ქსელში წერს.
მისი თქმით, საჭიროა პარტიის წესდებაში ცვლილებები და სტრუქტურის რეორგანიზაცია.
„ძმათა შორის ომს დაემსგავსა ეს მარაზმი! ამ საყვედურებში ყველას ავიწყდება, რომ ყველა დამნაშავე ვართ, პუტინის პატიმარი მიშა რომ დღემდე ვერ დავიხსენით. ყველაზე დიდ პოლიტიკურ ორგანიზაციას აკეთილშობილებს პასუხისმგებლობა და დისციპლინა.
საჭიროა პარტიის წესდებაში ცვლილებები და სტრუქტურის რეორგანიზაცია. ვერც დიქტატორმა უნდა გმართოს და ვერც ოლიგარქმა, თუ სამშობლო გიყვარს. ვტოვებ პოლიტსაბჭოს. ვაგრძელებ ბრძოლას, ვრჩები ამ დიდი ოჯახის წევრი და მჯერა, რომ დღეს ვინც სხვადასხვა აზრზე დგას, მალე ერთად მოგვიწევს ბრძოლა!
პარტიის პოლიტსაბჭოში ბევრი ღირსეული წევრი და თანამებრძოლია, მაგრამ ვისურვებდი უფრო ქმედითს, მეტი გამჭვირვალობით და დემოკრატიულად არჩეულს. ძალა ხალხშია! ძალა სიმართლეშია!“, – წერს ბადრი ბასიშვილი.
