გარემოსდაცვითი ზედამხედველობის დეპარტამენტის აღმოსავლეთის რეგიონული სამმართველოს თანამშრომლებმა უკანონო ტყითსარგებლობის 10 ფაქტი გამოავლინეს. აღნიშნული ინფორმაცია გარემოს ზედამხედველობითი დეპარტამენტის ფეისბუქ გვერდზე გამოქვეყნდა.

ინფორმაციაში ნათქვამია, რომ ხაშურისა და ქარელის მუნიციპალიტეტებში შეჩერებული 3 მანქანის მძღოლი, ყოველგვარი დოკუმენტაციის გარეშე ახდენდა 15 მ3-მდე პირველადი გადამუშავების პროდუქტის ტრანსპორტირებას. ავტომანქანები დაილუქა. ასევე  ხაშურის მუნიციპალიტეტში მოქალაქეების მიერ, 3 ერთეული ფიჭვის სახეობის მორის უკანონო ჭრისა და ტრანსპორტირების 2 ფაქტი გამოვლინდა.

ტყითსარგებლობის უკანონო ფაქტი გამოვლინდა თიანეთის მუნიციპალიტეტში, სადაც მოქალაქემ 2 ძირი წიფლის სახეობის ხე, ყოველგვარი დოკუმენტაციის გარეშე მოჭრა.

დუშეთისა და ხაშურის მუნიციპალიტეტებში შეჩერებული 4 ავტომანქანის ძარაზე, ჯამში 8 მ3-მდე სხვადასხვა სახეობის საშეშე მერქანი იყო განთავსებული.